Why Should we study Literature
آج شعبۂ اردو، مرکزی جامعۂ کشمیر کے آرٹس کیمپس میں سلسلہ وار توسیعی خطبوں کے تحت ایک اہم علمی نشست کا انعقاد کیا گیا، جس میں اردو ادب کے ممتاز ادیب و پروفیسر مشتاق احمد کو بطور مہمان خصوصی مدعو کیا گیا۔ پروفیسر مشتاق احمد کسی تعارف کے محتاج نہیں، انہوں نے اردو ادب کے فروغ کے لیے گراں قدر خدمات انجام دی ہیں اور آج بھی علمی و ادبی میدان میں بھرپور سرگرمی کے ساتھ مصروف عمل ہیں۔ وہ مختلف اعلیٰ انتظامی عہدوں، مثلاً رجسٹرار اور صدر شعبہ پر فائز رہ چکے ہیں، نیز معروف ادبی جریدہ جہان اردو کے مدیر کے طور پر بھی اپنی خدمات انجام دے رہے ہیں۔
اس بامقصد نشست میں انہوں نے “ہم ادب کیوں پڑھیں” کے عنوان پر شعبۂ اردو کے طلبہ و طالبات اور محققین سے خطاب کیا۔ اپنے فکرانگیز بیان میں انہوں نے ادب کی اہمیت کو مختلف زاویوں سے اجاگر کیا اور عالمی و برصغیر کے مفکرین و ادیبوں جیسے رابندرناتھ ٹیگور، علامہ شبلی نعمانی، ٹی۔ ایس۔ ایلیٹ اور نام چامسکی کے افکار کی روشنی میں واضح کیا کہ ادب انسان کے فکری اور روحانی ارتقا میں بنیادی کردار ادا کرتا ہے۔ ان کا کہنا تھا کہ ادب انسان کو کشادہ نظری عطا کرتا ہے، نئی جہات سے روشناس کراتا ہے اور زندگی کے اندھیروں میں رہنمائی فراہم کرتا ہے۔ ادب ایک ایسی بصیرت افروز حقیقت ہے جو انسان کو خود شناسی اور دنیا فہمی کا شعور بخشتی ہے۔
محفل کا آغاز ڈاکٹر راشد عزیز نے مہمان خصوصی پروفیسر مشتاق احمد اور ان کی اہلیہ رابیہ مشتاق کا پرتپاک استقبال کر کے کیا۔ اس کے بعد ڈاکٹر الطاف حسین نقشبندی نے پروفیسر مشتاق احمد کی ادبی خدمات اور علمی کارناموں کا جامع و مدلل جائزہ پیش کیا، جس سے حاضرین کو ان کی شخصیت کے مختلف پہلوؤں سے آگاہی حاصل ہوئی۔
تقریب کے اختتام پر ڈاکٹر نصرت جبین نے مہمان خصوصی کا شکریہ ادا کیا اور ساتھ ہی یونیورسٹی کے وائس چانسلر پروفیسر اے۔ راویندر ناتھ اور ڈین اسکول آف لینگویجز پروفیسر سندھیا تیواری صاحبہ کا خصوصی طور پر ذکر کیا، جن کی معاونت سے یہ بامعنی نشست ممکن ہو سکی۔ انہوں نے طلبہ و طالبات اور محققین کا بھی شکریہ ادا کیا، جن کی فعال شرکت نے اس محفل کو مزید باوقار بنا دیا۔ آخر میں ڈاکٹر نصرت جبین صاحبہ نے اس خوبصورت شعر کے ساتھ محفل کے اختتام کا اعلان کیا۔
جذبات اک عالم اکبر ہے الفاظ کی دنیا چھوٹی سی
اظہار تشکر کیوں کر ہو یہ جرات جرات بے بجا ہے
یہ توسیعی خطبہ طلبہ و محققین کے لیے نہایت مفید ثابت ہوا، جس کے ذریعے انہیں ادب کی افادیت اور اس کی معنویت کو گہرائی کے ساتھ سمجھنے کا موقع ملا۔یوں یہ علمی نشست خوشگوار اور پُراثر انداز میں اپنے اختتام کو پہنچی۔