Urdu Marsiyah Mein Dabeer ka Makam
شعبہ اردو، سینٹرل یونی ورسٹی آف کشمیر کے زیرِ اہتمام ایک اہم علمی و ادبی نشست کا انعقاد عمل میں آیا، جس میں معروف ادیب، محقق اور نقاد پروفیسر محمد زمان آزردہ نے “اردو مرثیہ میں دبیر کا مقام” کے موضوع پر نہایت علمی، فکری اور بصیرت افروز گفتگو فرمائی۔ اس علمی نشست میں شعبۂ اردو کے اساتذہ، ریسرچ اسکالرز اور طلبہ کی بڑی تعداد نے شرکت کی اور مہمان مکرم کے پرمغز افکار و خیالات سے بھرپور استفادہ کیا۔
پروگرام کا آغاز تلاوتِ کلامِ پاک سے ہوا، جس کے بعد ڈاکٹر راشد عزیز صاحب نے نہایت خوش اسلوبی کے ساتھ نظامت کے فرائض انجام دیے۔ انہوں نے اپنے ابتدائی کلمات میں مہمانِ خصوصی کا خیر مقدم کرتے ہوئے کہا کہ اس نوعیت کی علمی نشستیں طلبہ اور محققین کے فکری و تحقیقی شعور کو جلا بخشنے میں اہم کردار ادا کرتی ہیں۔
اس موقع پر شعبہ اردو کی سربراہ ڈاکٹر نصرت جبیں صاحبہ نے مہمانِ ذی وقار پروفیسر محمد زمان آزردہ صاحب کا تفصیلی تعارف پیش کیا۔ انہوں نے پروفیسر محمد زماں آزردہ کی ادبی، تنقیدی اور تحقیقی خدمات پر روشنی ڈالتے ہوئے کہا کہ وہ اردو ادب کے معتبر نقاد ، انشائیہ نگار اور محقق ہیں جن کی علمی خدمات اردو دنیا میں قدر و منزلت کی نگاہ سے دیکھی جاتی ہیں۔
پروفیسر محمد زمان آزردہ صاحب نے اپنے کلیدی خطاب میں “اردو مرثیہ میں دبیر کا مقام” پر تفصیلی اظہارِ خیال کرتے ہوئے مرزا سلامت علی دبیر کی فنی و تخلیقی عظمت، زبان و بیان کی ندرت، منظر نگاری، کردار نگاری اور شعری محاسن پر سیر حاصل گفتگو کی۔ انہوں نے کہا کہ دبیر نے اردو مرثیے کو نہ صرف فنی اعتبار سے استحکام بخشا بلکہ اپنے منفرد اسلوب اور تخلیقی صلاحیتوں کے ذریعے اسے ایک نئی وسعت عطا کی۔
پروفیسر موصوف نے مزید کہا کہ دبیر کے مرثیوں میں جذبات کی شدت، زبان کی شگفتگی اور واقعاتِ کربلا کی مؤثر عکاسی نمایاں طور پر نظر آتی ہے۔ انہوں نے اس امر پر بھی روشنی ڈالی کہ دبیر نے مرثیے کو صرف غم و الم کی شاعری تک محدود نہیں رکھا بلکہ اسے انسانی اقدار، صبر، قربانی اور حق و صداقت کی علامت کے طور پر پیش کیا۔ انہوں نے انیس و دبیر کے تقابلی مطالعے کے مختلف پہلوؤں پر بھی گفتگو کرتے ہوئے دبیر کی انفرادیت کو واضح کیا۔
نشست کے دوران طلبہ اور ریسرچ اسکالرز نے مختلف علمی سوالات بھی پیش کیے جن کے جوابات پروفیسر موصوف نے نہایت مدلل اور علمی انداز میں دیے۔ حاضرین نے ان کی علمی گفتگو کو بے حد مفید اور فکر انگیز قرار دیا۔
پروگرام کے اختتام پر ڈاکٹر الطاف حسین نقشبندی صاحب نے شکریہ کی رسم ادا کرتے ہوئے سیٹرل یونی ورسٹی آف کشمیر کے رئیس جامعہ پروفسیر اے - رویندر ناتھ صاحب , اور ڈین اسکول آف لینگویجز پروفیسر سندھیا تیواری صاحبہ کا خصوصی شکریہ ادا کیا کہ انھوں نے شعبہ اردو میں اس طرح کی علمی و فکری نشستوں کے انعقاد کے لیے اپنا بھرپور تعاون پیش کیا ، ڈاکٹر الطاف حسین نقشبندی نے مہمانِ خصوصی، اساتذہ، طلبہ اور منتظمین کا بھی شکریہ ادا کیا ، انہوں نے کہا کہ اس طرح کی علمی و ادبی نشستیں علمی ماحول کو فروغ دینے اور نئی نسل کو ادب و تحقیق سے جوڑنے میں اہم کردار ادا کرتی ہیں۔
یہ علمی نشست ہر لحاظ سے کامیاب رہی اور شرکاء نے اسے ایک یادگار اور مفید ادبی و تحقیقی تجربہ قرار دیا۔